A letter home.Dear Mammy
Dear Mammy
Ah hate it here at mah Grannies, she wullnae let me use her mobile phone or let me play with mah PS2. She’s even got me making mah bed in the mornin’ afore she gies me any breakfast. Ah telt her that wis your job, but she said you hud enough on yer plate withoot runnin’ efter me, an’ that ah wis big enough tae dae it masell noo.
An anither thing, she disnae huv any sugar puffs, says they’ll rot mah teeth, ah’ll huv tae eat porridge an’ she wullnae let me put sugar oan it either.
She said the morra we’re huvin’ eggs fur breakfast, ah telt hur ah didnae like eggs either, she said ah wid jist be eatin’ the toast wae butter then an’ wid ye believe it she disnae even huv any jam, said honey wis better fur me, ahm no eatin’ that...its horrible.
Aw mammy ah hate it here at mah grannies, last night ah wantit tae watch that programme on the tele, you know the wan that we watch the gither sittin’ on the sofa wae a tub o’ popcorn laffin’ oor heids aff at. She said we hud tae watch somethin’ educational whitiver that means.
Ah wish ah could come hame, ah’v goat tae go tae bed at eight o’ clock every night an’ ahm no’ even allowed tae read mah book ah brought wae me tae read in bed.. She’s really cruel, ur ye sure she’s yer mammy, she’s nothin’ like you.
Grampa says if ahm good an’ dae whit mah granny tells me he’ll take me oot fishin’ in his boat the morra. He said we’ll be away fur a guid few hours but ah wis watchin’ the weather forecast on the tele an’ it said it wis gonnae pour wae rain. Ah don’t want tae be stuck oot oan the watter in a dinghy if its goin’ tae be pourin’ doon a’ day.
Aw mammy ah wish mah wee brother or sister wid hurry up an’ be born, ahm goin’ mad here, ah want tae come hame. Can ah no’ go an’ stay at mah pal Johnnies, his mammy likes huvin’ me ower ther, his hoose has bunk beds an’ ye know his mammy lets me sleep ower there every other weekend so Johnny an’ I kin play oor x boxes the gither...aw go on mammy wull ye ask her? stayin’ here is worse than bein’ at boardin’ school wae a’ grannies rules. Mah granny’s nae fun at a’….she hoovers a’ day an’ cleans windaes an’ wan day she made me dae the dustin’...that’s a lassies job intit???? Her meals are awfy an’ she wullnae even get me a pizza an’ ye know how much a love mah pizza, ah tried tae talk tae her aboot maybe goin’ tae McDonalds, she nearly hud a fit, she said mammies should be cookin’ fur ther weans, no’ lettin’ some ither person dae it.
Oh please ask Johnny’s mammy if I kin stay wae them, ah want tae come hame, ah miss you an’ mah daddy
love Davie